കുഞ്ചാക്കോ ബോബനും നയൻതാരയും ഒന്നിച്ച 'നിഴൽ' കഴിഞ്ഞ മാസം തീയേറ്ററുകളിലെത്തി ശ്രദ്ധ നേടിയ ചിത്രമാണ്. മെയ് 11നാണ് ചിത്രം ആമസോൺ പ്രൈമിൽ സ്ട്രീമിംഗ് ആരംഭിച്ചത്. മികച്ച പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നത്. മികച്ചൊരു സൈക്കോളജിക്കൽ മിസ്റ്ററി ത്രില്ലറാണെന്നാണ് സോഷ്യൽമീഡിയയിലുള്‍പ്പെടെ പലരും സിനിമാഗ്രൂപ്പുകളിലും മറ്റും അഭിപ്രായങ്ങള്‍ പങ്കുവയ്ക്കുന്നത്. രാജ്യാന്തര പുരസ്‌കാരങ്ങൾ നേടിയ സിനിമകളുടെയും, നിരവധി ഹിറ്റ് സിനിമകളുടെയും എഡിറ്റർ അപ്പു ഭട്ടതിരിയാണ് സിനിമയുടെ സംവിധായകൻ. ചിത്രത്തിൽ എട്ടുവയസ്സുകാരനായ നിഥിൻ എന്ന ഒരു കുട്ടിയെ ചുറ്റിപറ്റിയാണ് കഥ നടക്കുന്നത്. നിഥിൻ പറയുന്ന കഥയ്ക്ക് പിന്നാലെയാണ് സിനിമ നീങ്ങുന്നത്. മലപ്പുറം സ്വദേശിയായ ഇപ്പോൾ ദുബായിയിൽ കുടുംബത്തോടൊപ്പം കഴിയുന്ന ഐസിൻ ഹാഷ് എന്ന എട്ടുവയസ്സുകാരൻ ബാലനാണ് ചിത്രത്തിൽ ഈ കഥാപാത്രത്തെ അവതരിപ്പിച്ചിരിക്കുന്നത്. ദുബായിലെ അന്താരാഷ്ട്ര പരസ്യമോഡൽ കൂടിയായ ഐസിന് ആദ്യമായാണ് സിനിമയിൽ അഭിനയിക്കുന്നത്. ആദ്യ സിനിമയിൽ തന്നെ മികച്ച വേഷമാണ് ഐസിന് ലഭിച്ചിരിക്കുന്നത്. 'നിഴൽ' സിനിമയുടെ വിശേഷങ്ങളുമായി ഐസിൻ 'സമയം മലയാള'ത്തോടൊപ്പം. ഇതിനകം അറുപതിലേറെ ഇംഗ്ലീഷ്, അറബിക് പരസ്യങ്ങളില്‍ അഭിനയിക്കുകയും മോഡലാകുകയും ചെയ്തയാളാണ് ഐസിന് ഹാഷ്. ഐസിൻ ആദ്യമായി അഭിനയിക്കുന്ന സിനിമയാണ് നിഴല്‍. കിന്‍ഡര്‍ ജോയ്, ഫോക്സ്-വാഗൺ, നിഡോ, വാര്‍ണര്‍ ബ്രോസ്, ലൈഫ്‌ബോയ്, വാവെയ്, ഹെയിൻസ് തുടങ്ങിയ അന്താരാഷ്ട്ര ബ്രാന്‍ഡുകളുടെ പരസ്യങ്ങളില്‍ അഭിനയിച്ചിട്ടുള്ള ഐസിന്, അറബിക് പരസ്യങ്ങളിലെ 'എമിറാത്തി ബോയ്' എന്ന പേരിലും ശ്രദ്ധ നേടിയിട്ടുണ്ട്.
മൂന്നാം വയസ്സില്‍ അഭിനയിച്ച ഒരു വീഡിയോ വൈറലായിരുന്നു. ശേഷം ചില സിനിമകളിലും പരസ്യങ്ങളിലും അവസരം ലഭിച്ചെങ്കിലും അത് മുടങ്ങി. പിന്നീട് അഞ്ചാം വയസ്സില്‍ പീഡിയാഷുവറിന്‍റെ പരസ്യത്തിലൂടെയാണ് ഐസിന് മോഡലിംഗ് രംഗത്ത് വീണ്ടും സജീവമായി തുടങ്ങിയത്.
ദുബായ്, അബുദാബി ഗവൺമെന്‍റുകളുടെ പരസ്യങ്ങളിലും സ്ഥിരസാന്നിധ്യമാണ്. ഇംഗ്ലണ്ട് ഫുട്ബാള്‍ ടീമിന്‍റെയും ലിവര്‍പൂളിന്‍റെയും നായകനായിരുന്ന ഫുട്ബോള്‍ ഇതിഹാസം സ്റ്റീവന്‍ ജെറാര്‍ഡിനെ ആറാമത്തെ വയസ്സില്‍ ഇന്‍റര്‍വ്യൂ ചെയ്ത്, അന്താരാഷ്ട്ര തലത്തിലും ഐസിന് ഏറെ ശ്രദ്ധിക്കപ്പെട്ടിട്ടുണ്ട്. ഇതിന്‍റെ വീഡിയോ സോഷ്യൽമീഡിയയിൽ വൈറലായിരുന്നു.
നയന്‍താരയും കുഞ്ചാക്കോ ബോബനുമൊത്തുള്ള സിനിമയിലെ പ്രധാന സീനുകള്‍ അനായാസമായി ചിത്രീകരിക്കാന്‍, എട്ടു വയസ്സുകാരനായ ഐസിന്റെ ഈ അഭിനയ പരിചയം ഏറെ ഗുണകരമായിട്ടുണ്ടെന്നാണ് സിനിമയുടെ അണിയറപ്രവര്‍ത്തകര്‍ പറയുന്നത്. എസ് സഞ്ജീവാണ് സിനിമയുടെ തിരക്കഥയൊരുക്കിയിരിക്കുന്നത്. ആന്‍റോ ജോസഫ് ഫിലിം കമ്പനിക്കൊപ്പം അഭിജിത് എം പിള്ള, ബാദുഷ, സംവിധായകന് ഫെല്ലിനി ടി.പി, ജിനേഷ് ജോസ് എന്നിവർ നിർ‍മ്മാതാക്കളാണ്. ദീപക് ഡി മേനോൻ ക്യാമറയും, സൂരജ് എസ്. കുറുപ്പ് സംഗീതസംവിധാനവും നിർവഹിച്ചിരിക്കുന്നതാണ് സിനിമ. ഈ സിനിമയിൽ ഐസിന്റെ കഥാപാത്രത്തിന് ശബ്‍ദം നല്‍കിയിരിക്കുന്നതും ഐസിന് തന്നെയാണ്.
Also Read: ഡ്രീം കാസ്റ്റ്! ലോകം കാണുന്നതുവരെ കാത്തിരിക്കാനാവുന്നില്ലെന്ന് ഗീതു മോഹൻദാസ്
കുറച്ചു നാൾ ചില സിനിമകളില്‍ അഭിനയിക്കാന്‍ ഐസിനു വിളി വന്നെങ്കിലും, പല കാരണങ്ങള്‍കൊണ്ടും നടക്കാതെപോയെന്ന് ഐസിന്റെ പിതാവ് ഹാഷ് ജവാദ് പറഞ്ഞു. ഒരു സുഹൃത്ത് വഴിയാണ് നിഴല്‍ സിനിമയുടെ സഹ സംവിധായകന് സന്ദീപ് ബന്ധപ്പെട്ടത്. അങ്ങനെ സൂം കോള്‍ വഴി ദുബായിയിൽ ഇരുന്നാണ് ഒഡീഷനില്‍ പങ്കെടുത്തത്.
ഈ സിനിമയിലെ കഥാപാത്രത്തിനാവശ്യമായ എല്ലാ സംഗതികളും ഒത്തുവന്നപ്പോള്‍ കൊവിഡ് കാലത്തെ വിമാനയാത്ര ആയിരുന്നു ഒരു പ്രധാനവെല്ലുവിളിയായത്. എങ്കിലും ഒോഡീഷന്‍ ചെയ്ത നൂറുകണക്കിന് കുട്ടികളില്‍നിന്നും അവസാന നിമിഷം ഐസിനെ തിരഞ്ഞെടുത്തുവെന്ന് ഹാഷ് ജവാദ്.
തെന്നിന്ത്യയിലെ ഏറെ തിരക്കേറിയ താരം നയന്‍താരയിൽ നിന്ന് ഒരു സര്‍പ്രൈസ് ഗിഫ്റ്റ് ലഭിച്ച ത്രില്ലിലുമാണ് ഐസിന് ഹാഷ്. വളരെ കുറഞ്ഞ സമയത്തിനുള്ളില്‍ താരത്തിന്‍റെ മനസ്സ് കീഴടക്കി ഐസിൻ. മാത്രമല്ല നിഴല്‍ സിനിമയ്ക്കുവേണ്ടി അവർ അനുവദിച്ച കുറച്ച് ദിവസങ്ങള്‍ക്കുള്ളില്‍ തന്നെ അവരുടെ ഭാഗം ചിത്രീകരണം പൂര്‍ത്തീകരിച്ച്, ചെന്നൈയിലേക്ക് തിരിച്ചുപോകാനും കഴിഞ്ഞു. അവരും ഐസിനും ഒരുമിച്ച് നിരവധി രംഗങ്ങൾ ചിത്രത്തിലുണ്ട്. ഐസിനെ ഏറെ ഇഷ്ടപ്പെട്ട അവർ അവന് ഏറെ ഇഷ്ട്ടമുള്ള സൂപ്പര്‍ ഹീറോ കഥാപാത്രങ്ങളുടെ കളിപ്പാട്ടങ്ങളും വിലകൂടിയ ചോക്ക്‌ലേറ്റുകളുമാണ് സർപ്രൈസായി സമ്മാനിച്ചുവെന്ന് ഹാഷ് ജാവേദ് പറഞ്ഞു.
Also Read: ഇഷ്ടമുള്ളവരെ 'ചനകുറുക്കൻ' എന്നേ വിളിക്കൂ! അപ്പ ഹാജയുമൊത്തുള്ള ഓർമ്മകളുമായി കൃഷ്ണകുമാർ
മലയാളത്തിലെ ശ്രദ്ധേയനായ നടൻ കുഞ്ചാക്കോ ബോബനോടൊപ്പവും ആദ്യ സിനിമയിൽ അഭിനയിക്കാനായത് ഭാഗ്യമാണ്. നിരവധി വിദേശ സംവിധായകര്‍ക്കും സാങ്കേതിക വിദഗ്ധര്‍ക്കുമൊപ്പം മുമ്പ് പ്രവർത്തിച്ചിട്ടുള്ള ഐസിനു മലയാള സിനിമ അഭിനയം ഏറെ പുതുമയുള്ളതായിരുന്നു. കുസൃതിയും തമാശകളും പിണക്കവും എല്ലാം ഉണ്ടെങ്കിലും അഭിനയവും സമയനിഷ്ഠതയുമൊക്കെ തികച്ചും പ്രഫഷണലാണ്. ചാക്കോച്ചനോടൊപ്പം പെട്ടെന്ന് ഐസിൻ കൂട്ടായി, ഇതോടെ സിനിമയുടെ രംഗങ്ങളൊക്കെ രസകരമായി ഐസിന് പൂർത്തിയാക്കാൻ കഴിഞ്ഞു.
ദുബായിലെ തിരക്കുള്ള പരസ്യമോഡലാണ് ഐസിൻ. മലയാളത്തിൽ ആദ്യമായാണ് ഐസിൻ അഭിനയിച്ചത്. അതിനാൽ തന്നെ ഈ സിനിമയില്‍ അഭിനയിക്കാന്‍ ഏറ്റവും മികച്ച പ്രതിഫലമാണ് നിര്‍മ്മാതാക്കള്‍ നല്‍കിയതെന്നും ഹാഷ് ജാവദ് വ്യക്തമാക്കി.
അറബ് ലോകത്ത് ഏറെ ശ്രദ്ധേയനായ റാപ്പറായ ഫ്രീക്കിന്‍റെ 'കാഫി' എന്ന മ്യൂസിക് വീഡിയോയില്‍ പ്രധാന വേഷത്തില്‍ വേഷത്തില്‍ ഐസിന് അഭിനയിച്ചിരുന്നു. വീടുകളില്‍നേരിടുന്ന പീഡനങ്ങളും, മാനസികാരോഗ്യ പ്രശ്‌നങ്ങളും കുട്ടികളിൽ വരുത്തുന്ന മാനസിക സംഘര്‍ഷങ്ങളുമാണ് കാഫിയില്‍ ചിത്രീകരിച്ചിട്ടുള്ളത്. 'മതി' എന്നതിന്റെ അറബിവാക്കാണ് കാഫി. പൃഥ്വിരാജ് സുകുമാരൻ നായകനായ ആടു ജീവിതത്തില്‍ അഭിനയിക്കുന്ന അറബ് താരം റിക്ക് എബിയാണ് വീഡിയോയിൽ ഐസിന്റെ പിതാവായി അഭിനയിച്ചിട്ടുള്ളത്.
അജ്മാന്‍ ഹാബിറ്റാറ്റ് സ്‌കൂളിലെ ഗ്രേഡ് 3 വിദ്യാര്‍ഥിയുമാണ് ഐസിൻ. ഇപ്പോള്‍ ഓൺലൈൻ ക്ലാസുകള്‍ ആയതിനാൽ ഷൂട്ടിന്‍റെ സമയത്തും ക്ലാസുകളിൽ പങ്കെടുക്കാൻ കഴിഞ്ഞിരുന്നു. സിനിമ ഷൂട്ടിങ്ങിനിടക്ക് നടന്ന പല പരീക്ഷകളും സെറ്റില്‍ വെച്ചായിരുന്നു ഐസിൻ എഴുതിയത്. ഷൂട്ടിനിടയിൽ കാരവാനിലിരുന്നും, ഓടിക്കൊണ്ടിരിക്കുന്ന കാറിലിരുന്നും, ഷോപ്പിംഗ് മാളിലിരുന്നുമൊക്കെയാണ് പരീക്ഷയെഴുതിയതെന്ന് ഹാഷ് പറഞ്ഞു.
ദുബായ്‍‍യിൽ സോഷ്യല്‍ മീഡിയ മാനേജരായി ജോലിചെയ്യുന്ന മലപ്പുറം നിലമ്പൂര്‍ മൂത്തേടം സ്വദേശിയായ ഹാഷ് ജവാദിന്‍റെയും അബൂദാബിയില്‍ മൈക്രോബയോളജിസ്റ്റായ കോഴിക്കോട് സ്വദേശി നസീഹയുടെയും മകനാണ് ഐസിന്. ഏക സഹോദരി ഹവാസിന്‍ ഹാഷ്. രണ്ടരവയസ്സുള്ള ഹവാസിനും പരസ്യ ചിത്രങ്ങളില്‍ അഭിനയിച്ചിട്ടുണ്ട്.
കുഞ്ചാക്കോ ബോബനും നയൻതാരയും ഒന്നിച്ച 'നിഴൽ' കഴിഞ്ഞ മാസം തീയേറ്ററുകളിലെത്തി ശ്രദ്ധ നേടിയ ചിത്രമാണ്. മെയ് 11നാണ് ചിത്രം ആമസോൺ പ്രൈമിൽ സ്ട്രീമിംഗ് ആരംഭിച്ചത്. മികച്ച പ്രതികരണമാണ് ചിത്രത്തിന് ലഭിച്ചുകൊണ്ടിരിക്കുന്നത്. മികച്ചൊരു സൈക്കോളജിക്കൽ മിസ്റ്ററി ത്രില്ലറാണെന്നാണ് സോഷ്യൽമീഡിയയിലുള്‍പ്പെടെ പലരും സിനിമാഗ്രൂപ്പുകളിലും മറ്റും അഭിപ്രായങ്ങള്‍ പങ്കുവയ്ക്കുന്നത്. രാജ്യാന്തര പുരസ്‌കാരങ്ങൾ നേടിയ സിനിമകളുടെയും, നിരവധി ഹിറ്റ് സിനിമകളുടെയും എഡിറ്റർ അപ്പു ഭട്ടതിരിയാണ് സിനിമയുടെ സംവിധായകൻ. ചിത്രത്തിൽ എട്ടുവയസ്സുകാരനായ നിഥിൻ എന്ന ഒരു കുട്ടിയെ ചുറ്റിപറ്റിയാണ് കഥ നടക്കുന്നത്. നിഥിൻ പറയുന്ന കഥയ്ക്ക് പിന്നാലെയാണ് സിനിമ നീങ്ങുന്നത്. മലപ്പുറം സ്വദേശിയായ ഇപ്പോൾ ദുബായിയിൽ കുടുംബത്തോടൊപ്പം കഴിയുന്ന ഐസിൻ ഹാഷ് എന്ന എട്ടുവയസ്സുകാരൻ ബാലനാണ് ചിത്രത്തിൽ ഈ കഥാപാത്രത്തെ അവതരിപ്പിച്ചിരിക്കുന്നത്. ദുബായിലെ അന്താരാഷ്ട്ര പരസ്യമോഡൽ കൂടിയായ ഐസിന് ആദ്യമായാണ് സിനിമയിൽ അഭിനയിക്കുന്നത്. ആദ്യ സിനിമയിൽ തന്നെ മികച്ച വേഷമാണ് ഐസിന് ലഭിച്ചിരിക്കുന്നത്. 'നിഴൽ' സിനിമയുടെ വിശേഷങ്ങളുമായി ഐസിൻ 'സമയം മലയാള'ത്തോടൊപ്പം.
No comments: